Kontsumoaren barometroa: euskaldunok ez gara fidatzen Internetez erosteko orduan
Eroski Taldearen Fundazioak Kontsumoaren Barometroa sortu du, jakiteko kontsumitzaileok zein joera eta pertzeptzio ditugun kontsumo gaietan. Horretarako 5.000 pertsona elkarrizketatu ditu estatu espainiarrean. Galdetegien emaitzak Consumer aldizkariak argitaratu ditu, abenduko alean, aldizkariaren 50.ean hain zuzen. Emaitzek diotenez, euskaldunok ez gara larregi bereizten besteengandik. Hori bai, ez gara bat ere fidatzen Internetez erosteko orduan. Non fida, han gal, dio esaera zaharrak. Eta badirudi horren lilurapean bizi garela oraindik ere.
Consumer aldizkariak 14 urtetik gorako 5.000 lagun elkarrizketatu ditu telefonoz, estatu espainiarraren erkidego guztietan. Euskaldunok honela pentsatzen dugu, Euskal Autonomia Erkidegoan eta Nafarroako Foru Erkidegoan jasotako erantzunek erakusten dutenez:
- Elikagaiak. Euskaldunok konfiantzarik handiena erakutsi dugu elikagaietan.
- Markak. Marken aurrean, berriz, gogobetetze maila apalena agertu dugu.
- Etxebizitza. Uste dugu etxebizitzako gastuagatik konpentsazio txikiena jaso dugula.
- Kontsumitzaileen aldeko elkarteak. Hobekien jasotzen dugu horrelako elkarteen eginkizuna, kontsumitzailea defendatzeko unean.
- Elikagai ekologikoak. Sentitzen dugu informazio onena dugula elikagai ekologikoen gainean.
- Euroa. Aseenak agertzen gara euroaz emandako informazioarekin eta besteek baino kezka gutxiago erakutsi dugu diru berriaren aurrean.
- Erosketak Interneten. Euskaldunok mesfidantza handiena erakutsi dutenen artean gaude erosketak Interneten egiteko orduan.
- Denbora irabazteko zerbitzuak. Euskaldunok inor baino gutxiago gaude prest ordaintzeko erosketan denbora aurreztuko luketen zerbitzuengatik.
Eroski Fundazioak urtero egingo ditu galdeketa hauek, jakiteko nola aldatzen diren kontsumitzaileen iritziak.
Erantzun
Sartu