Arauak errespetatuz idatzi behar da Sustatun

Sustatun badaude adibideak anonimotasuna modu egokian ulertu dutenak. Gogora datozkigu Sustatuko irakurleendako ezagunak izango diren Dick Turpin, Asto Rider edo Taxi Driver, esaterako. Anonimotasuna, beraz, onartzeko modukoa ere bada Interneten. Baina zenbait kasutan anonimotasuna pertsonak edo erakundeak deskalifikatzeko eta errespetu eskasez tratatzeko ere erabili izan da.

Anonimotasuna gaizki ulertzen dutenak

Adibidez ez zaigu zilegi iruditzen izen eta guzti bere iritzia eman duen pertsona bati beste batek, anonimotasunean oinarrituta, iritzia ematea alderdiak agindu diola esatea. Kasu horretan, albistea aitzakiatzat hartuta, pertsona erasotzen dela deritzogu.

Era berean, hizkera zabarrekoak iruditzen zaizkigu "...besteen mokordoak kopiatu eta irenstarazi..." bezalako esaldiak. Ez dugu uste izan behar den errespetuzko jokabidea azaltzen denik, norbere izena ezkutatuz, entitateen edo erakundeen kontra "Jetalari" eta gisako adjektiboak erabiltzen direnean.

Zelako berriak dira Sustatukoak

Sustaturen helburu nagusia informatzea da, gaurkotasunezko berri interesgarriak plazaratzea, nahiz eta gogoeta intelektualak eta iritzi hutsezko gauza interesanteak ere publikatu izan diren eta halaxe egingo dugun aurrerantzean ere. Era berean, oso interesgarria iruditzen zaigu argitaratzen diren albisteen inguruko iritzi trukea eta eztabaida piztea ere.

Baina, beti ere, errespetua oinarri hartuta. Horrela denean, dudarik gabe, albistea bera aberasten laguntzen dute askotan eta weblog baten balioa agerian geratzen da: tresna bizia, eztabaidarako egokia, interaktibitate handiduna...

Beraz, iritzi eta eztabaida jokoetan sartu nahi duenak jakin behar du pertsona nahiz erakundeen aurkako errespetu faltaz jokatzea edo irainak jaurtitzea ez dela Sustaturen arauek onartzen duten jarrera bat. Are gutxiago anonimotasunetik eta hizkera zabarretik jokatu nahi bada.

Anonimotasunak ezin du balio inor mintzeko

Anonimotasuna onargarri da Sustatun baina, arauetan esaten den legez, espero dugu irakurleek zentzuarekin erabiltzea aukera hau, errespetuzko iritzi trukea eta benetako adierazpen askatasuna posible izan dadin. Izan ere, erantzun eta informazio osagarriak moderatu gabe igarotzen dira eta honek joko arauak onartzera derrigortzen du partaidea.

Iban Arantzabal, Sustatuko editorea
Inazio Arregi, Goienako Zuzendari nagusia
Luistxo Fernandez, Code & Syntax-ekoa
Mikel Irizar eta Joxe Aranzabal Batzorde editorialekoak