Spam-a: hau da hau zerrikeria!
Zuek ere jasotzen dituzue eskatu gabeko mezu pila bat? Kokoteraino zaudete inoiz erosiko ez duzun poltsikoko telefono horren iragarkiak jasotzen? Nola jakin dute zure helbidea Afrikako tipo hauek? Spam-a: Informazio Gizarteak ekarri digun on guztien artean tragatu beharreko zerrikeria.
Ez dakigu zer den egin beharrekoa "kaka" hori guztia ez jasotzeko. Gure ordenagailuan dagoen posta kudeatzaileak badu erremintaren bat, baina ez ehuneko ehunean segurua. Beharbada Sustatuko irakurleren batek jakingo du metodo egokiren bat... Nik gustura irakurriko nuke Lourdeseko miraria letxe etorriko litzateken aholkuren bat...
Nik bost posta helbide erabiltzen ditut eta horietako bi ia zabaldu ezin diren horietakoak dira. Leporaino betetzen zait mezuak jasotzen dituen kutxa eta apartatu ezinda ibiltzen naiz kaka baino ez diren mezu horien bila. Nire kasuan, ingelesez datozen gehienak, ez dira asko inporta zaizkidanak, eta beraz, nire makinari esan beharko nioke ez egiteko kasurik ingelesez datozen mezuei, baina hori eginda, galdu ere galtzen ditut ingelesez heldu arren asko axola zaizkidan gauzak. Gaur bertan, horietako bat apartatu dut gainontzeko iragarki uholdetik. Eskerrak Before & After magazine-tik bidali didaten mezua irakurri dudan, bestela harpidetza bi aldiz ordaindu beharko nuke "Bank Error" egin dutela-eta.
Posta zerrenda batean irakurtzea egin dut timoak egiten direla nigeriar erara ere. Honela zioen Mikelek eibartarrak zerrendan: *Afrikako herrialde bateko presidentearen andreak (ejem ejem) idatzi zidan, handik dirua atera nahi zutela eta negozio bat proposatzen. "Timo a la nigeriana" deitzen omen diote honi.
Ez da lehenengoa eta azkena ere izango Spam-aren adarretan harrapaturik dagoena. Zuei ere gertatzen zaizue? Zer egiten duzue Spamaren kontra?
Lagun bati irakurri diot sarean, spamaren azken teknologia spam pertsonalizatua deitzen zaiola. Toparen topea omen da. Egin klik erantsi dugun argazki horretan, ikusiko duzu.
Erantzunak
Interneten zeresan handia duen AOL enpresak (Amerika On Line) 6,38 milloi euro irabazi ditu SPAM-a salatuz. Spam-a CN productions-ek egin zuen. Nola? milioi bat mezu elektroniko AOLko erabiltzaileei bidaliz. Jakina, hartzaileak ez zeukan aurrez esanda jaso gura zuenik eta horixe geratu da demostratua epaitegian.
CN productions-ek nagusiendako ziren webgune batzuetarako loturak ematen zituen. Orain dirutza hori ordaindu beharko du.
Esan behar dugu, dirutzarik inork eskatu ez dezan, Sustatuk dituen harpidedun guzti-guztiak beraiek gura izan dutelako direla. Ez dugu inortxo ere harpidetu berak gura ez izanda.
Joxemarik ere Spam-a egiten du?
Gobernu espainiarrak Prestige auzia dela eta Espainia guztira bidali behar ditu gutunak (baita Euskal Herrira ere, ustez). Horrekin zein ondo jokatu duen azalduko digu Aznarrek. Ba pentsa ezazue 20pta kostatzen bada gutun bakoitza bidaltzea (gehiago ere izango da...) hori 15 milioi familiagatik biderkatuta 300 milioi pezeta direla.
Helduko dira gutunok eta nik zabaltzeko gogoa ere izango dut esaten dituen barbaridadeak irakurtzeko (Maria Teresa Campos ere entzuten dut batzuetan eta oraintxe bertan irratian, RNE-n, mahi hartako bi kolaboratzailek diotena entzuten nago...). Hala ere, onena berriz bueltatzea izango da. Esango diot postariari ez dudala nahi gutun hori jasotzea eta bueltatzeko. Pentsatzen dut Galiziatik karta asko bueltatuko direla eta Euskal Herritik ere ez gutxiago. Edo?
Baina hau Spam-a da edo zer da? Editoreak dioen moduan epaitegira eramango dugu eta dirua atera?
Mac OS X erabiltzaileek badute
Mozillak 1.3k izango du
Windowsean ere izan dezakezu
baina zer da?
SPAM Hiltzailea: Matematika Bayesiarrak
Osoitz
Nik ez dakit spam-a den edo ez. Gainera, elkarteen berri jasotzea gustatu ere gustatzen zaigu askotan. Dena den, iragartzea gura izan eta horrelakoak egitea...
Gipuzkoako Mendi Federaziokoek alpinismo ikastaroa antolatu dute eta hori Internet bidez iragartzeko zer? ba kartela eskaneatu dute eta 5 megako mezuak bidali dituzte. Hartzaileak? ba EITBkoak, herri aldizkari guztiak, polikiroldegi batzuk, mendi elkarte batzuk... denera ehun helbide inguru 5 megako kartel bat jasotzeko.
Eta bertan dakarren informazioa zein den? ba ikastaroaren egunak etab. (Mezuan dakartzanak esango ditugu, propaganda egin daitekeela erakusteko 5 mega bidali gabe).
Alpinismo ikastaroa otsailaren 1 eta 2an.
Berri honetan, irakurlea konturatuko zen moduan, esaten da otsailak 30ean elkartuko direla ikastaroaren azalpenak jasotzeko.
Ba 5 megako kartel horretan errorea dago eta otsaila beharrean urtarrila behar luke. Noski, kartelak berriz inprentara bidaltzea, berriz inprentako denbora hori guztia galtzea, kartelaren errua norena den eta norena ez, inprentan berriz kartel guztiak botatzea, diru pila bat... eta testu hori zuzendu eta e-mailez bidaltzea? zero euro!
Baina ez, 5 megako kartela bidaliko digute berriz.
Baliteke Sustatuko irakurleren bati interesatu izana, beraz, argibideetarako telefonoak ere emango ditugu hemen, zero euroren truke eta mezu kutxa kolapsatu gabe.
Gehiago jakin nahi duenak Gipuzkoako Mendizale Federakundera jo dezake, Anoetako estadioan dago bulegoa, 20014 posta kodean, Donostia. Astelehen, asteazken eta ostegunetan 11:00etatik 14:00etara egoten dira eta baita arratsaldez, 17:00etatik 20:00etara ere.
Telefonoa: 943 461 440, faxa: 943 474 574.
oh.: Mendizaleek ez dute informazioa e-postaz jasotzen, dirudienez.