Elurra teilatuan, zakua lepuan…

Hemen ere oraintxe arte bota eta bota jardun du. Orain hasi da pixka bat argitzen.

Bideak elurrez zuri zuri, baina ez dirudi oraindik zirkulatzeko beste munduko arazorik dagoenik.

Harrituta nago, Euskal Herria zuri-zuri dagoenean, Beran ateri, eta eguraldia argitzen ari da. Euria izan da nagusi gau eta goiz partean, eta elur itxura guti du Euskal Herriko gunerik hezeenetakoa den honek.

A-8 autopistaren egoeraren berri badu inork? Donostia eta Bergarara jo behar dut gaur. Irekia dagoela badakit, baina elurra ari al du inguru horietan?

Bergara

Bergara ere zuri-zuri dago eta ia goiz osoan elurra edo txingorra izan dugu, ia eten gabe. Une honetan elurra ari du. Hala ere, autoak normaltasunez dabiltza -ohi baino polikiago, hori bai. Hori, behintzat, erdigunean.

Oñati

Neu Oñatin bizi naiz eta egunero etortzen naiz Bergarara. Gaur goizean, Oñatitik irtetzeko arazoak izan ditut. Zubillaga auzoraino, errepideak elur geruza bat zuen -ez oso lodia, baina nahikoa oso-oso poliki gidatu behar izateko , 20/30 km/orduko abiaduran-edo, argiak-eta piztuta. Zubillagatik Elorregira eta handik Bergarara, errepidea askoz hobeto zegoen. Ziur nago, ordea, orain arazo gehiago izango dituztela gidariek, batez ere, Oñatira gerturatu heinean.

Gogoratu errepideen egoeraren gaineko informazioa 902 11 20 88 telefonoan lor dezakegula, edo hemen (sarri gaurkotzen dute orri hori).

Larrabetzu
Ardiak larreetan, elurra mendian.
Uritik ari naiz idazten, ikusten. Elurra gogoz egin duen arren, ez du bost minutu baino gehiago zuritzerik lortu.
Horregatik, ardiak lasai lasai dabiz belarra jaten inguruko landetan. Ez du gainera horrenbesteko hotzik egiten.
Bart, ordu biak aldera bota du lehenengo elurraldia. Baina zuritu barik.
Gaztelu auzoa eta Gaztelumendi (325m) zuri dago, Bizkargi (564m) be bai.
Bideak garbi.
Eta guk noiz zurituko zai.

Elosu

Bertatik bertara ezin izan dugu ikusi, baina Elosuko jatetxekoek esan digutenez, errepidea nahiko gaizki dago. Joatekotan, mendiko automobilean joan behar da, oraindik ez baita pasatu elurra kentzeko makina. 13:00ak inguruan igo dira jatetxeko langileak Azkoiti aldetik, eta ez ei dute batere automobilik ikusi. Hortaz, behar-beharrezkoa ez baldin bada, edo oso abentureroak ez baldin bazarete, hobe Elosu alderako bisita beste baterako lagatzea.

Elgoibarren ere, behingoagatik, zuritu dira bazterrak (bueno, bazterrak eta bazterrak ez direnak). Mendi inguruak zuri-zuri daude eta errepideak eta kaleak ere ari dira zuritzen. Halere, oraingoz ez dut uste kate beharrik dagoenik Elgoibarrera iristeko.

13:50 direnean, Hego Euskal Herriko aireportuek ere igarri dute elurraren erasoa. Une honetan Gasteizkoa itxita dago. Iruñekoa oraintxe ireki dute, eta Hondarribikoa eta Bilbokoa irekita daude.

Hemen denak zerura begira, baina oraingoz ezer ez.



Kazkabarra gogor espero da ordea datozen egunetarako.

Bergara eta Antzuola arteko errepidea itxita

Egia esan, ez dago itxita elurragatik espreski, elurrak eragindako istripu batengatik, baizik. Bergaratik Antzuolako Elay lantegira lanera zihoazen hiru bergararrekin topo egin dut oraintxe, eta buelta hartu behar izan dute, bi kamioi errepidean gurutzatuta daudelako eta errepidea itxita dagoelako. Gero, beste lagun bati entzun diot esaten hiru bat ordurako egongo dela itxita errepidea. Hori entzun ei du berak. Dena dela, saiatu naiz Ertzaintzaren prentsa bulegora eta Bergarako komisaldegira deitu eta informatzen, baina batean ez didate telefonorik hartzen eta bestea, berriz, komunikatzen ari da etengabe. Entzundako kontu horiek besterik ez dakizkit, beraz.

Bart gauean izandako tximistek 7.000 familia utzi dituzte argi barik Bizkaian. Eguerdirako 3.000 geratzen ziren oraindik argirik ez zutela. Horixe esan du Iberdrolak.

Hemen be inguru danak zurittta zatzak gainea 3 egun goiaz holaxe. Etxuat neurtu baina edurra metro bete inguruan ibilliko dala esan leikedot. Astebukaerako plan earra izan leiteke Urbixaruntz bueltatxo bat emutia eta naturaleziak dakon edertasun honekin gozaittia.

Editore honek lehenengo aldiz hartu ditu ordenagailu zuri-zuri honen (i-mac zoragarria da hau ere) mandoak. Oraintxe egin da argia. Horrenbeste Sareko Argia eta... kaka zaharra! Argirik ez. Ezin piztu ordenagailua.
Piztuta ere, telefono linearik ez. Timofonika lanean ei dago, baina 13:00ak arte ezin izan da inora deitu.

Atzo iluntzeko 20:30etik oraintxe arte ezin izan dut Sustatu irakurri ere egin argia falta zela-eta. Elgeta zuri-zuri bitartean, gero eta zuriago (zuri, zentzurik onenean, e?). Orain kateekin eta orain itxita. Izotza behean eta gaina edurtuta. Kamioiak gurutzatuta, autoak baztarra jota... hau da hau giroa. Gaur gauean, horrelakoetan gertatzen den bezala, martxa egongo da gure herri txikian. Zurito batera gonbidatuta Sustatuzaleok.

Orain ere edurra mara-mara dihardu eta zuri dago kontua. Intxorta aldera bueltatxoa egitea pentsatua nuenean argia jarri Iberdrolak. Badirudi, beti, beti, gure kontra dagoela konpainia hori! Gaurkoagatik ere lanari eutsi behar, ondorioz.

Elgetara etortzen peripeziak egin beharko dituzue, baina denbora eta gogoa duzuenok segi aurrera. Bueno, auto zahartxoa edo oso dirudunak bazarete hobeto, ze...

Bulegoko leihotik paraje eder askoa ikusten da eta hemendik urtenda are ederragoa, baina... Benetan merezi duela. Edurra zain dago nork zapalduko.

Debagoienetik Debabarrenera egiteko bidea ere ez dago batere ondo. Orain dela ordu erdi kontatu didate Plazentziako (Soraluzeko) saihesbidean kamioi bat gurutzatuta geratu dela goian, eta beste bi behean. Ondorioz, ibilgailu guztiak herri barrutik desbideratzen ari ei dira, zelanbait. Kontatu didatenez, auto ilarak ia Elgoibarreraino iristen ziren duela gutxi.

Luiziak

Horrez gain, Bergararen eta Mekolalderen artean berriro ere luiziak izan dira, eta, goizean behintzat, txandaka ibili gara handik pasatzen. Auto ilarak Osintxuko saihesbideraino iritsi dira. Elurrari dagokionez, oraingoz ez ditu arazo larregirik sortu. Baina, poliki-poliki ibili beharra dago. Eta, duela ordubeteko berrien arabera, ez dabil autobusik bidean.

Atzo idatzi zigun sustatura Ultzamatik ainitzek, hauxe kontatzeko: elurra Ultzamako bailaran.



--------------------------

Gaur urtarrilak 30 ultzaman elurra dagoenez haurrak ez dira eskolara etorri



Goizeko bederatzietan haurrak ez dira eskolan agertu elurra mara-mara ari duelako. irakasleen gehiengoa agertu da arazoak izan arren errepidean. haurrak ez daudenez klaserik ez da egongo. Aprobetxatu dezatela haur guztiek elurrarekin jolasteko ez du askotan egiten eta.

---------------------------



Pentsatzen dut gaur 31 ere ez zutela eskolarik izango haurrek. Ba segi dezatela gozatzen.

> Elurra zain dago, nork zapalduko.

Horixe bera pentsatu dut nik ere. Hiru egun etxean irten ezinik egon eta gero, eguerdi parteko elurtea ikusi ostean, eta aprobetxatuz une batez ateri dela, kalera irten naiz, eguneroko osteratxoa egitera, hori bai, mendiko botak ipini, ondo-ondo jantzi eta guardasola hartu ondoren.

Ikusi dut Elgetarako bidearen hasieran Ertzaintzak jarri duela kartela, itxita; ikusi ditut txoriek eta txakurrek elurrean utzitako arrastoak; ikusi dut hegazki pare bat Loiura bidean; ikusi ditut, inoiz baino ederrago, Intxorta, Kanpazar, Memaia eta Besaide inguruak erabat zuri; ikusi dut gaztetxo talde bat piper egin eta irristatzera zihoanazenak.

Herritik gora egin dut, Zenita aldera eta Arginetaren oinean Lekeriketara egin dut. Han elurrak zopa-zopa ez, baina krak eta krak egiten zuen, zuri eta eder, zapaltzerakoan. Une labur batez eguzkia ere agertu da. Eta horrek zuritasun berezia eman dio elurrari.

Poliki-poliki, beherantz egin dut eta berriro entzun dut zopa-zopa oinkada bakoitzean. Eta etxerantz nentorrela pentsatu dut pribilejiatua naizela, ezbeharrean ere zoriona aurki daitekeelako, adibidez paraje elurtuetan.

Eta gogoratu naiz aspaldiko atsotitz hartaz: “elur-melur, enauk hire beldur, etxean badiat nahiko ogi eta egur”.

Besarkada handi bat denoi eta ondo pasatu asteburua!

> Debagoienetik Debabarrenera egiteko bidea ere ez dago batere ondo.

Ubanek dioenari jarraiki, esan, Arrasateko kaleek zurituta jarraitzen dutela, eta orain eguraldia argitu egin bada ere, (arratsaldeko lau eta erdiak pasatxo dira) orain ordu laurden bota eta bota ari zen. Arrasateko kaleetan autoz ibiltzeko ez dago arazorik, baina, auzoetara igotzeko seguru norbaitek komeria ederrak pasa dituela.

Goizeko hamaikak aldera bazirudien bota beharreko elur guztia botata zegoela, baina arratsaldeko lehenengo orduetan ere gogotik egin du elurra. Eguneko berriak jasotzeko ere zailtasunak izan ditugu. Egunkaria eta Gara (Oiartzunen ez omen da argirik egon, editoreak Elgetari buruz esan duen antzerakoa gertatu omen da) egunkariak berandu iritsi dira herriko kioskoetara, eta badirudi GOIENKARIA bihar jasoko dugula, Iruñetik ekartzen dute-eta. Horrez gain, atzo arratsaldetik Arrasateko eta Aretxabaletako bizilagunak telebista gabe gaude. Hala ere, GOITB-ko lankideek lanean jarraitzen dute, seinalea iritsiko den itxaropenaz.

Arlaban eta Gatzaga itxita

Arrasate eta inguruetatik Gasteizera joan nahi dutenek beste batean saiatu beharko dira, gaur Arlaban eta Gatzagako portuak itxita daude-eta. Atzo ere horrela egon ziren. Portu hasieran zegoen kartelak hala zioen, baina guk goraino igotzea lortu genuen. Ertzaintzari deitu eta gero, kartel horiek kentzeko lana diputazioarena dela esan ziguten. Kontua da, batengatik edo bestearengatik, baina errepidea egoera onean zegoela. GOITBko kamerek kalean igaro dute goiza, inguruko errepideen egoera zein den ikusten. Aramaiora joateko zailtasunak izan dituzte.

PD: Lehenengo ostarteak ikusten dira, eta telebistako seinalea bueltatu da, lanera, beraz.

Xabik dioen moduan, GOIENKARIA ez da gaur banatuko.



Elur ekaitza dela eta, arazoak izan dira GOIENKARIA, Debagoieneko astekaria, banatzeko. Gaur egubakoitza, ez da banatuko GOIENKARIA, ohi bezala. Bihar, zapatua, egingo da banaketa. Goizean hasi eta bazkal ostera arte.



Iruñeako errotatibatik Debagoienera datorren kamioia Zumarragan geratu da, ez atzera ez aurrera. Buelta ematea erabaki du A8 autobidetik etortzeko, baina Ormaiztegin dago kateatuta, kamioiak errepidean gurutzatuta daudelako.



Banaketa, bihar, zapatua egingo da, ekaitzak lagatzen badigu.

Araba ere zuri agertu da gaur. Eta egunean zehar elur mordoa egin du. Gasteizen azterketa asko bertan behera geratu dira EHUn. Osakidetzako azterketak, ordea, egin dira, baina iritsi ez direnek izango dute beste aukerarik.

Burgoserantz ezin da egin errepidean, Burgos kolapsaturik dago eta. Herrera, Opakua eta Urkiola ere itxita daude, Etxegarate bezala.

Eta Arabako urtegiak gainezka egiteko zorian omen daude. Txarrena da ezin direla ateak ireki ura joan dadin, ibaiak hazita doazelako. Ikusi egin behar zer gertatzen den datozen orduetan.

Donostiatik Elgetarako bidea libre dago, oraintxe egin baitut tarte hori. Autopista erabat garbi dago, eta Eibartik Elgetarako zatian elur pixar bat dago errepidean, baina ez aparteko deus ere. Elgetako karrikak daude okerren, baina ibili ere ibil daiteke.

Donostialde guztia ere garbi dago, batere elurrik gabe, mendi tontorretan dagoena baino ez.

Hori ba, tropikoko negua dan moduan: gabaz euri jasa, egunez bero itzela eta eguzkia diz diz-



Palenque Ekuador