CaF Elhuyar sarietan irabazle Oihana Izaguirre eta Oihane Lakar biologoak

Dibulgazio-artikuluei dagokionez, Oihana Izaguirre eta Oihane Lakar biologoen lanak jaso zuen lehen saria, Meandroetako mina izenburupean aurkeztutako artikuluarekin, hain zuzen. Dibulgazio-liburua idazteko beka aldiz, Kepa Altonaga biologoak jaso zuen Etxepare, Aldudeko medikua proiektuarengatik.

• Oihana Izaguirre eta Oihane Lakar, Meandroetako mina: Ibaien ekologia du aztergai. Epaimahaikoek lan horri lehen saria ematea erabaki zuten, "gure ibaien, gure lurraren zainen, osasun-egoeraren jarraipena nola egin hitz apalez azalduz zientzia eta dibulgazioa maisuki uztartzen dituelako". Ibai osasuntsua zer den deskribatzeaz gain, Euskal Herrian egoera zertan den azaldu dute, eta ibaien egoera sistematikoki neurtu ahal izateko metodologia garatzen egindako lanen berri eman dute. Metodologia horiek garatzea oso garrantzitsua izango da, Europako Uren Arteztaraua bete ahal izateko. Saria (Imanol Andonegi eskultoreak egindako oroigarria eta 900 €) Juan Gastesi CAF enpresako giza baliabideetako buruak eman zien.
• Bigarren saria Replikantearen Jazz Arima lanak irabazi du. Aitzol Ezeizak, Karmele López de Ipiñak eta Montxo López de Ipiñ**ak konputagailuen adimena eta sentimena garatzeko egiten ari diren bideak aztertu dituzte, eta etorkizunari begira leihatila bat ireki dute. Epaimahaiak gaiaren gaurkotasuna, eduki zientifikoaren kalitatea, erabilitako idazkeraren estiloa eta gai gogor eta astun bat era sinple eta ulerkorrean aurkeztea baloratu du. Saria (oroigarria eta 450€) Itziar Nogeras, Elhuyar Fundazioko zuzendari nagusiaren eskutik jaso zuten.
• Hirugarren saria, berriz, Kafeina: behar bihur daitekeen plazera artikuluari eman dio epaimahaiak. Epaimahaiaren ustez, artikuluak ongi eta txukun adierazten ditu kafeinari buruzko alderdi eta arlo interesgarriak, hala nola arlo historikoak, eraginaren mekanismo fisiologikoak eta horren ondorioz sortzen diren mendekotasun- eta abstinentzia-egoera guztiak. Aitziber Mendiguren, Luis F. Callado, eta Joseba Pineda medikuak dira lanaren egileak. Saria (oroigarria eta 300 €) Jose Mari Rodriguez Ibabek, Elhuyar Fundazioko lehendakariak, eman zuen.

Dibulgatzaile gazteentzako sari berezia Gorka Azkunek irabazi du aurten ere, Izarren Energia artikuluarengatik. Gorkak Fisika atsegin du, eta, gai zailak erraz azaltzeko abileziari esker, dagoeneko hirutan jaso du CAF-Elhuyar sariren bat. Oraingoan, fusio nuklearrari heldu dio, gaurkotasun beteko gaia inondik ere. Izarretan gertatzen den erreakzioa kontrolpean egin eta ustiatzeko asmoak zertan diren esplikatu du, fusio nuklearraren oinarria azalduz lehenengo, ITER izeneko nazioarteko egitasmoaren azkeneko aurrerapenen berri eman arte. "Dotore idatzitako artikulua" delako jaso du saria, "erraz irakurtzen da, baina gaiari dagokion zehaztasuna galdu gabe". Saria (oroigarria eta 300 €), epaimahaiaren bozeramaileak, Pili Kaltzadak, eman zion.

Dibulgazio-liburua idazteko beka

Dibulgazio-liburua idazteko beka Kepa Altonaga biologo eta dibulgatzaileak jaso zuen, Etxepare, Aldudeko medikua liburu-proiektuarengatik. Epaimahaiak aho batez erabaki zuen proiektuak saria merezi zuela, "lagina eta lanaren azalpena biribila izateaz gainera, abiapuntu beretik erakargarria egiten baita proposamena".

Epaimahaiaren iritziz, lan osatu, aberats eta entretenigarria izango da Altonagarena. Saria Iñaki Peña VIII. edizioko irabazlearen eskutik jaso zuen Kepa Altonagak.

Barietate handia artikuluetan

Hemeretzi artikulu izan dira lehian aurtengo CAF-Elhuyar sarietan, eta, epaimahaiak adierazitakoaren arabera, barietate handia izan da gaiei eta lantzeko moduei dagokienez. Ez omen dira batere aspertu, eta, lan guztiek erabat gogobete ez dituzten arren, azpimarratu dute oro har lanak kalitate handikoak izan direla. Bost lagun hauek osatu dute epaimahaia: Koldo Nuñez-Betelu, Geologian doktorea eta zientzia-dibulgatzailea; Pili Kaltzada, kazetaria eta zientzia-dibulgatzailea; Mikel Alvarez, medikua eta Basurtuko Ospitaleko zuzendari nagusia; Jesus Ugalde Kimika katedraduna eta Ikerketako Euskadi sariaren aurtengo irabazlea; eta Julián Florez, Industria Ingeniaritzan doktorea, Nafarroako Unibertsitateko irakaslea eta VICOMTech ikerketa-zentroko kudeatzailea.

Iazko sarituaren aurkezpena

Bestalde, orain bi urte saritutako proiektua, Iñaki Peñaren Enpresen sorrera EAEn XXI. mende-atarian lana alegia, aurkeztu zen ekitaldian. Liburu hori, hain zuzen, egoera berri eta zailei aurre egiten saiatzen diren milaka eta milaka enpresa-sortzaileren omenaldi txiki gisa egindako ikerlana da.